LAOAG CITY – Panggep ti Department of Agriculture (DA) nga ikabil dagiti outlet ti Kadiwa iti tunggal munisipyo iti intero a pagilian.
Iti Pre-State of The Nation Address briefing, kinuna ni Department of Agriculture Secretary Francisco Tiu Laurel Jr., daytoy ket tapno direkta a mailako dagiti mannalon ti apitda iti publiko ken saan a lumasat kadagiti middlemen.
Kinunana a makagatang met dagiti consumer iti nalaklaka a produkto ken taraon babaen iti daytoy a programa.
Nupay kasta, kinuna ni Laurel a kasapulan ti panagpuonan kadagiti agricultural post harvest facilities, cold storages, warehouses, ken ikkan dagiti mannalon iti nababa nga interes a pautang.
Kabayatanna, agtalek ni Laurel nga ipaay ti Kongreso ti umdas a pondo tapno maipatungpal dagitoy a proyekto.
