LAOAG CITY – Naminpinsan nga ipawil ti gobierno ti Zimbabwe ti panagusar ti cellphone dagiti pulis kabayatan a nakaduty dagitoy.
Naipalaon iti naiparuk-at a memorandum a masapol nga ited dagiti pulis dagiti gadgets da iti supervisor da kabayatan a nakaduty da ken mabalin da laeng nga usaren daytoy no break time da.
Awan ti nailanad a rason iti naiparuk-at a memorandum ngem possible a paset daytoy ti ar-aramiden nga addang ti gobierno tapno maliklikan ti korapsyon babaen kadagiti pulis.
Naipatungpal daytoy, sumagmamano nga aldaw kalpasan a natiliw ti dua a traffic enforcement officers iti ciudad ti Harare gapu ta naduktalan a dumawdawat da ti pasuksuk kadagiti pampubliko a transportasyon.
