LAOAG CITY – Inrakurak ni House Speaker Ferdinand Martin G. Romualdez ti maysa a komprehensibo nga estratehiya ti nagduduma a sangay ti gobyerno tapno maipababa ti presyo ti bagas kagiddan ti inparuk-at a direktiba ni Presidente Ferdinand R. Marcos Jr. a kissayan ti taripa a maipatpataw iti imported a bagas.
Basar iti National Economic and Development Authority (NEDA), maysa nga executive order ti iparuk-at ni Presidente Marcos tapno maipababa iti 15 a porsiento ti taripa iti imported a bagas manipod iti agdama a 35 a porsiento.
Gagem daytoy a maipababa iti P29 ti presyo ti kada kilo a bagas.
Inrakurak daytoy ti lider ti Kamara de representantes kalpasan a nakitaripnong kadagiti opisyal ti Department of Agriculture (DA), Department of Trade and Industry (DTI), Bureau of Customs (BOC), ken dadduma pay nga stakeholders, karaman ti pribado a sektor.
Nakadwa ni Speaker Romualdez iti taripnong da Quezon 1st District Rep. Mark Enverga, chairman ti House Committee on Agriculture and Food, ken Deputy Majority Leader for Communications ken ni Rep. Erwin Tulfo.
Inpetteng ni Speaker Romualdez ti panagkalikagom ti administrasyon Marcos a kabaelan ti siasinno man ti gumatang ti bagas ken adda ti umdas a suplay daytoy.
Dinakamat ni Speaker Romualdez ti napateg a papel ti Department of Trade and Industry tapno masigurado a marikna ti publiko ti pannakaipababa ti taripa iti bagas.
