LAOAG CITY – Pinaawagan ti gobierno ti China ni Philippine Ambassador to China Jaime Flor Cruz.
Daytoy ket kalpasan a kinablaawan ni Presidente Ferdinand Marcos Jr. ni Taiwanese President-elect Lai Ching-te kagiddan ti panangirakurak na a napintas ti relasyon ti Pilipinas iti Taiwan, banag a saan a nagustuwan ti China.
Iti maysa a rakurak, inbatad ni Chinese foreign ministry spokesperson Mao Ning a pinaawagan ni Assistant Minister Nong Rong ti ambassador ti Pilipinas iti pagilyan da tapno pagpalawagen mainaig it nagbalin nga aksyon ni Presidente Marcos Jr.
Inpetteng ti China a ti inaramid ni Presidente Marcos ket maysa a dakkel a panaglabsing iti One China Principle a pinagtibker laeng iti kallabes ti pagilyan.
Kagiddan iti daytoy, nagballaag pay ti nasao a Chinese official iti Pilipinas a saan nga agay-ayam ti apoy kangrunaan na iti isyu ti Taiwan isut gapuna a rumbeng nga isardeng ti pagilyan ti pannakibibiang kadagiti isyu nga adda ti pakainaigan iti Taiwan.
