LAOAG CITY – Nailako iti balor a $175,000 wenno katukad ti P10.2 million ti gold bikini ni Princess Leia ti Star Wars movie a Return of the Jedi pakairamanan ti dadduma pay nga Star Wars movie props.
Basar iti Heritage Auctions, nangiyuswatda ti Hollywood auction idi Hulio 24 agingga iti 25 no sadinno sumagmamano nga Star Wars artifacts ti nailako ken maysa ditoy ti gold bikini nga aruat ti karakter a ni Princess Leia a pagbidbidaan ti aktres a ni Carrie Fisher iti nasao a 1983 sequel ti Star Wars movie franchise.
Ti gold bikini ket dinisenio ni Nilo Rodis-Jamero, maysa a Filipino-American Assistant Art director of Visual Effects iti Hollywood.
Idi daan a pannaki-uman iti pimmusay nga aktres a ni Fisher idi 2016, inyestoriana ti nagbalin a challenging para kenkuana kadagiti panagala ti sumagmamano nga eksena iti Return of the Jedi gapu ta saan isuna a komportable kabayatan a nakasuot daytoy ti gold bikini.
