LAOAG CITY – Nakitaripnong ni Governor Cecilia Araneta-Marcos iti Provincial Director iti Ilocos Norte Police Provincial Office ken dagiti amin a chief of police iti Ilocos Norte tapno amwen ti estado dagiti napaspasamak a nagsasaruno a pammapatay ditoy probinsya a kaadoan kadagiti nagbalin a biktima ket babbai.
Karaman ditoyen ti napasamak a pammaltog iti ili ti San Nicolas a nakatayan ti aglive-in partners, kasta pay iti ili ti Piddig a nakatayan ti agina a taga Solsona, ken iti ili ti Dingras a nakatayan ti maysa nga inhinyero.
Inpasigurado dagiti opisyal ti nailian a pulisya iti gobernador a naiget a tututukan da dagitoy a kaso ken inpasigurado da a maipaayan ti hustisya dagiti biktima.
Inkari pay ti nailian a pulisya nga aramiden da amin a kabaelan da tapno maipababa no saan man a malapdan dagiti mapaspasamak a krimen ditoy probinsya.
Kabayatanna, nailanad iti report ti nailian a pulisya ket kaadoan kadagiti nairekord nga insidente iti kallabes ket isolated case ken naipasigurado ti panagtalinaed a natalged ditoy probinsya no maipapan iti seguridad.
Mainaig iti daytoy, inrakurak met ni Provincial Director Police Col. Joemar Labiano nga amin dagiti insidente ti pammaltog ditoy probinsya iti kallabes ket adda ti pakainaigan ti third party wenno love triangle.
