LAOAG CITY – Kalikagum ni Gov. Matthew Marcos Manotoc a maamuan no naiget ti pannakaipatungpal ti Liqour Ban kadagiti nagduduma nga ili ken dua a siudad ditoy probinsya.
Pakaseknan pay daytoy ti epekto na iti bilang dagiti maak-aksidente ken dagiti dadduma a pasamak nga adda ti pannakainaig na iti kaadda iti impluwensya ti nasanger.
Napanunot ti gobernador a maipatungpal ti liqour ban tapno bumaba ti bilang dagiti maak-aksidente gapu iti impluwensya ti nasanger ken anyaman a klase ti krimen.
Nakaipalaon iti nasao a paglintegan a nasken nga agarup 100 a metro ti kaadayo dagiti paglakoan kadagiti mainom a nasanger kadagiti simbaan ken pagadalan.
Segun kenni Sangguniang Panlalawigan Member DaVinci Crisostomo, maiparit pay iti panaginom ti arak iti uneg ti lugan uray nakaparking daytoy.
Innayon pay ti agpanpanday linteg a dagus a maipatungal ti liqour ban no adda ti nakaro a kalamidad ditoy probinsya.
