LAOAG – Dinutukan ni Gov. Matthew Marcos Manotoc nga Officer In-charge ti Provincial Education Office ni Ilocos Norte Youth Development Officer Mr. Willie Jake Sib-at.
Mainaig iti daytoy, inbatad ni Sib-at a saan a nasdaaw iti panangdutok kenkuana ti gobernador gapu ta addan dagiti immun-una a nangiparparipirip kenkuana iti daytoy a banag.
Ibilangna a dakkel a karit ti baro a takem nga inpaay kenkuana ti gobernador nangnangruna ket saan a mainaig iti edukasyon ti kursona.
Nupay kasta, mamati a nakasagana a mangannong iti baro a takemna agsipud ta naunday metten a panawen a makikamkammayet iti Provincial Education Office a mangipapaay ti serbisio ken programa kadagiti estudiante ken kadagiti pagadalan.
Kabayatanna, inlawlawag ni Sib-at nga iti agdama ket mannarimaan ti panangad-adalna kadagiti scholarship grant nangnangruna kadagiti maididiaya a prayoridad a kurso.
Kunana a masapol a matingiting a naimbag no dagiti nasao a kurso ket isu pay laeng ti kasapulan kadagitoy a panawen.
Inlawlawagna a basar iti panagadal ket dagiti “highly technical” a kurso ti masapul kadagiti masungsungad a tawen kas kadagiti inhiniero, abugado ken dagiti agtrabtrabaho iti medical field.
Segun kenkuana, malaksid iti scholarship program ket nasken pay a maadal dagiti dadduma a programa kas kadagiti maisaysayangkat a “training” para kadagiti agad-adal ken dagiti mangisursuro.
Innayonna a makikokoordinar iti Public Employment Service Office no ania dagiti industria nga in-demand kadagiti sumarsaruno a tawen tapno dagitoy ti maidiaya kadagiti agad-adal nga alaenda a kurso iti sumarsaruno a tawen.
