LAOAG CITY – Immapela ni Gov. Matthew Marcos Manotoc iti Dept. of Health (DOH) a mangipaay ti ad-ado a bakuna kontra iti covid-19 ditoy probinsya.
Segun kenni Manotoc, babaen iti daytoy ket makapaggunay ti probinsya kadagiti sumarsaruno nga addang a rumbeng a maaramid.
Inlawlawag na a daytoy ket tapno adda met dagiti agsasaruno a pryoridad a mabakunaan.
Kunana a kangrunaan a panpanunuten na ket dagiti pulis nga ibilbilang na a super frontliners nangruna kadagiti borders.
Mangnamnama ti gobernador a mabakunaan iti mabiit dagiti kameng ti pulisya ditoy probinsya.
Kabayatanna, inpakkammo ti gobernador a sumangpet ditoy Ilocos Norte ti inorder nga Astrazeneca iti 3rd quarter ti agdama tawen no sadinno.
Inbatad na nga umabot iti 60 a ribo a bakuna dagiti ummunan nga inorder ti probinsya.
Nupay kasta, kunana a manarimaan a maad-adal no kasapulan a nayunan ti gobierno probinsyal ti gatangen na a bakuna wenno iyuray laengen ti nayun nga ipaay ti gobierno national.
