LAOAG CITY – Inbinsabinsa ni Gob. Matthew Marcos Manotoc dagiti nagapuanan na iti la-sod ti 100 nga aldaw a panagtakem na kas Gobernador iti Ilocos Norte.
Segun kenkuana, ur-urayenda laengen dagiti tallo nga ambulansia a kiniddaw ken pinatgan ti Philippine Charity Sweepstakes Office (PCSO).
Kuna na a dagitoy ket maited iti ili a Bangui, Piddig ken iti Governor Roque Ablan Sr. Hospital.
Inbatadna a maplanplano pay ti pannakaipatakder dagiti Water Fountains kadagiti pampubliko a lugar a mangted ti nayon a napintas a buya ken ad-adda a maullukoy dagiti umay agpasiar a turista.
Inpasingked ni Gob. Manotoc nga agtultuloy ti pannakaiget ti implementasion ti Republic Act No. 9003 wenno Ecological Solid Waste Management Act of 2002 pakairamanan ti Anti-Littering and Anti-Plastic Ordinance ditoy probinsia.
Nagyaman ti Gobernador ti Department of Environment and Natural Resources Office (DENR) iti inpaayda a 25 a milyon a pisos para iti Solid Waste Management program.
Inpakaammo na a limmukay ti trapiko ditoy sentro ditoy Siudad ti Laoag gapu kadagiti naiyuswat a Clearing Operations kadagiti Provincial Roads ken dagiti kangrunaan a kalsada ditoy Siudad.
Inpannakel ni Gob. Manotoc ti Provincial Tourism Office nga idadauloan ni Provincial Tourism Officer Mr. Aianree Raquel ti nagud-od ti probinsia a maikatlo a puesto iti kalkalpas a National Convention ti Association of the Tourism Officers of the Philippines a nagsangailian ti probinsia.
Inbatadna nga addan ti naikabit a Wi-Fi Connection iti Kapitolio Probinsial, Laoag City Hall ken Aurora Park ken maisaruno a maiplastaran iti IT Park ti ili ti San Nicolas ken ti Batac City Hall.
Inpakaammo pay ti Gobernador nga addanton dagiti sumagmamano nga agad-adal iti Mariano Marcos State University iti Siudad ti Batac a manamnama nga agbalin nga Scholars iti Doctor’s Scholarship Prog.
Innayonna pay a naipaayan met ti tulong dagiti biktima ti naglabas a Bagyo Ineng.
