LAOAG CITY – Inpakaammo ni Gov. Matthew Marcos Manotoc a manarimaan pay laeng ti pannakaiplastar dagiti kandidato nga agpaidasig a makikadua iti Team Marcos para iti 2025 Midterm Elections.
Segun kenkuana, iti agdama ket kaadduan kadagiti ili ditoy probinsia ket addan ti napilida no sadinno sumagmamano kadagitoy ket manamnama nga agbalin a nabara nangruna iti maikadua a distrito.
Inbatadna a saan pay a pinal ken manarimaan pay laeng ti pannakaorganisar ti pannabukel ti Team Marcos.
Inlawlawagna a manamnama nga adda dagiti kandidato nga agpada nga iyendorsona pakairamanan da Ilocos Norte 1st District Representative Sandro Marcos ken Ilocos Norte 2nd District Representative Angelo Marcos Barba.
Nupay kasta, inadmitir ni Gov. Manotoc nga adda dagiti kandidato nga agbalin nga independent iti mapaspasangasangan a panagbubutos.
Innayonna nga adda man ti kanito a saan nga agpapada ti opinyon ti pamilia Marcos ngem sigurado nga agkaykaysa met laeng isuda iti kamaudiananna.
