LAOAG CITY – Napadayawan ti Ilocos Norte kas Most Sustainable and Liveable Province ditoy pagilian.
Daytoy ket kageddan ti panangpadayaw ti Sustainability Standards Inc. babaen iti Business Builders, Nation Builders and the Mosliv Awards ken ni Gob. Matthew Marcos Manotoc kas “Honorary Governor of the Year.”
Kangrunaan a nagibasaran ti nadakamat nga award giving body ti napintas a panangiwanwan ti gobernador tapno mataginayon ti panagdur-as, kinadalus ti aglawaw iti intero a probinsia.
Daytoy ket pakairamanan ti pannakatagiben ti salun-at ken ti agtultuloy a pannakaipaay ti pagtrabahoan dagiti umili.
Mainaig iti daytoy, inpadanon ni Gob. Marcos Manotoc ti napalaus a panagyamanna iti pammigbig nga inpaay ti SSI kenkuana.
Inbunannagna a dagitoy a pammadayaw ti ad-adda pay a mangpapigsa kenkuana a mangipaay iti serbisio a kasapulan dagiti umili.
Inpalgakna a kangrunaan nga isagutna ti nasao a pammadayaw kadagiti frontliners ti Ilocos Norte manipud kadagiti agserserbi iti benneg ti salun-at, dagiti otoridad, barangay frontliners, mayors ken dagiti volunteers.
