LAOAG CITY – Kiniddaw ni Gov. Matthew Marcos Manotoc iti IATF-MEID a maipan ti sibubukel nga Ilocos Norte iti babaen ti Localized Modified Enhanced Community Quarantine (MECQ) gapo iti panagngato ti kaso ti covid-19.
Bayat a maiyur-uray ti sungbat ti IATF, nangiparuk-at ni Gov. Manotoc ti EO 142-21 wenno interim guidelines nga agepekto intono bigat, Hulyo 29.
Basar iti EO, masapol ti panagusar ti facemask, face shield ken dua a metro a distansya ken liklikan dagiti 3 Cs wenno ti Closed spaces, Crowded places ken close contact.
Dagiti agtawen ti 18 agpababa ken agtawen ti 65 agpangato ket saan a mabalin a rumuar, pakairamanan dagiti addaan ti comorbidity, masikog.
Iti met curfew ken liquor ban ket manipud iti alas-nuebe iti rabii agingga iti alas-kwatro ti parbangon malaksid kadagiti health workers, hospital personnel iti public ken pribado a sector, government officials, kameng ti PNP ken BFP, ken dagiti maibilang nga APOR nga agtrabaho iti dayta nga oras.
Iti met biang ti transportasyon, dagiti traysikel ket masapol a maysa laeng ti pasahero na, 50 a porsiento a kapasidad iti Jeep ken PUBs ken dua laeng a pasaheros iti taxi.
Mainaig iti daytoy, dagiti aglabsing iti daytoy ket agmulta kas iti saan a panagisuot ti face mask, panaglabing iti curfew ken liquor ban no sadinno a ti first offense ket sangaribo a pisos; 2nd offense ket 2,000 pesos ken ti 3rd offense ket lima a ribo a pisos.
