LAOAG CITY – Mamati ni Gov. Matthew Marcos Manotoc a kasapulanen ti probinsia ti pannakaibunong ti contraceptives kadagiti agtutubo gapu iti panagngato iti kaso ti teenage pregnancy ditoy Ilocos Norte.
Inbatadna a basar iti datos ti gobierno probinsial, dumanon iti 122 ti nairekord a baro a kaso ti teenage pregnancy ita a tawen a nainayon ti nasurok a 500 nga agtutubo idi Enero agingga idi Disiembre 2023.
Mainaig iti daytoy, ibilangna iti nasao a datos kas maysa a krisis a mapaspasaran ti probinsia.
Inpettengna a saan laeng a dagiti mismo nagsikog iti maapektaran iti daytoy no di ket pakairamanan dagiti pamiliada, kabagian ken ti partner-da.
Kunana a nabayagen a supsuportaranna ti pannakaibunong ti contraceptives kadagiti agtutubo nangruna ket saan laeng a teenage pregnancy ti mabalin a masolusionan no di ket pakairamanan ti natalged a sexual health dagiti ubbing kangrunaanna ket ngumatngato pay ti kaso ti sexually transmitted diseases kas ti Human immunodeficiency virus.
Innayon ti gobernador nga ammona nga adda dagiti komunidad a saan nga umanamong iti daytoy a kalikagumna ngem namnamaenna a dumteng ti aldaw a maawatan ken akseptaren ti publiko iti daytoy a wagas tapno protehiran dagiti tattao.
