LAOAG CITY – Mamati ni Gob. Matthew Marcos Manotoc nga ad-adda pay nga agbalin a nagaget ken agpursigi dagiti Municipal ken City Nutrition Action Office ditoy probinsia a mangipababa iti bilang dagiti malnourished nga ubbing babaen iti pannakaipaay ti insentibo kadakuada.
Inlungalong ti gobernador ken ni Mrs. Elma Irapta, provincial nutrition action officer ti Ilocos Norte ti panangisayangkat iti programa a mangipaay kadagitoy ti insentibo.
Mainaig iti daytoy, inlawlawag ti provincial nutrition action officer nga addan ti maipatpatungpal a programa ditoy probinsia.
Imbatadna a daytoy ket ti maisaysayangkat iti tinawen a “Monitoring and Evaluation of Local Level Plan Implementation” wenno “MELLPI Pro” a pakaipapaayan ti pammadayaw kadagiti outstanding nutrition committee ken nutrition workers.
Nupay kasta, napinget ti kalikagum ti gobernador nga ad-adda pay a mapatibker ti nasao a tignay babaen iti panangnayon kadagiti mapadayawan nga ili ken barangay.
Inbilinna ken ni Irapta ti panangadal iti mabalin a pannakapadayaw ti sangapulo a City/Municipal Nutrition Action Office ken tallopulo a Barangay Nutrition Action Office.
Innayonna nga apaman a mapagsasaritaan ken maipinal daytoy dagiti maseknan ket maipadanon a dagus iti opisinana tapno maikiddawan ti supplemental budget.
