LAOAG CITY – Nagpadespensar ni Gov. Matthew Marcos Manotoc bayat ti panag-courtesy call kenkuana ni Laoag City Vice Mayor-elect Carlos Fariñas.
Daytoy ket mainaig iti isyu ti dredging activity ditoy ciudad ti Laoag partikular iti Padsan River.
Segun kenni Fariñas, nakigtot idi dimmawat ti despensar ti gobernador ngem inbaga na a mabalin a misunderstanding laeng ti napasamak iti nagbaetan dagiti residente ken ti pannakaiyuswat ti aktibidad.
Inlawlawag na a no mailawlawag a nalaing daytoy ken mapagsasaritaan ket posible ti napintas a pannakaipatungpal na ken inpasigurado na a kitaen na a nalaing daytoy.
Ummuna iti daytoy, ado dagiti arungaing dagiti residente kadagiti madalapos a barangay kas iti Barangay Lapaz gap ta patien dagitoy a maapektaran ti panagkalap da nga isu ti pagbiagan da.
Mangnamnama ni Fariñas a maurnos met laeng daytoy nga isyu.
Mainaig iti daytoy, inpasigurado ni Fariñas a daytoy ti rugi ti napintas a panagtinnunos ti probinsya ken lokal a gobierno ti ciudad ti Laoag.
Inpetteng na a nakasagana da a makitinnulong iti probinsya para iti pagsayaatan dagiti umili.
