LAOAG CITY – Nagyaman ni Gov. Matthew Marcos Manotoc kadagiti Orthopedic ken Plastic Surgeons manipud iti Singapore General Hospital a nagturong ditoy probinsia itay kallabes para iti Medical Mission.
Inbatadna nga iti medical care ket maysa a problema ditoy probinsia pakairamanan ti panangbirok kadagiti doktor, accessibility ken affordability.
Inlawlawagna a napinpintas no adda pay ti wagas a mapalawa ti nasao a medical mission tapno ad-adda pay a mapasayaat ti pannakaipadanon ti serbisio medikal a saan laeng nga iti Mariano Marcos Memorial Hospital & Medical Center no di ket amin nga ospital ditoy probinsia.
Inpasiguradona nga agtultuloy ti pannakikammayetda kadagiti agkakalaing a doktor tapno maipadanon dagitoy iti serbisioda ditoy probinsia a dakkel a makatulong kadagiti umili.
Maipalagip a nangiyuswat ti medical mission dagiti Orthopedic ken Plastic Surgeons manipud iti Singapore General Hospital babaen iti gobierno probinsial ken iti Mariano Marcos Memorial Hospital and Medical Center iti siudad ti Batac a nakabenepisiaran dagiti 18 a pasiente a dimmalan iti orthopedic surgery.
