LAOAG CITY – Pabor ni Gov. Matthew Marcos Manotoc a maikkaten dagiti barangay checkpoints no daytoy ket mangitunda ti nairot a trapiko.
Nupay kasta, kuna ni Manotoc a masapol a kasarita na pay laeng ni Pol. Lt. Col. Amador Quiocho, chief of police ti PNP-Laoag seknan iti daytoy a banag.
Inpagunam-gunam na pay a saan pay a mabalin ti panaglubbon kadagiti motorsiko uray no agasawa wenno agkarelasyon.
Inbatad pay ni Manotoc nga inimpormaran na dagiti lokal a gobierno iti kada ili a mangestablisar ti mabalin a wagas tapno maka-access dagiti agad-adal a dumaldalan iti online class ngem dagiti sumagmamano a LGU ket saan unay a napigsa ti signal ti internet da.
Inlawlawag na a dagiti frontliners ti iprayoridad a dumalan iti rapid testing gapo iti limitado a testing kits.
Inpasingked ti gobernador a nupay manamnama ti panagado dagiti returning residents ket makaumanay pay laeng ti Covid-19 response budget ti probinsya.
Nupay kasta, kunana a saan amin a gastos dagitoy ket ibaklay ti gobierno probinsyal ngem nakadependar ti kasasaad ti kaprobinsyaan nga agsubli ditoy Ilocos Norte.
Inpetteng manen ti gobernador nga amin a sumrek ditoy probinsya nga aggapo iti sabali a lugar ket masapol a dumalan iti quarantine.
