LAOAG CITY – Pabor ni Gobernador Matthew Marcos Manotoc iti pannakasubli ti operasion ti pallot ditoy Ilocos Norte.
Daytoy ket kalpasan nga inpalubus ti Inter-Agency Task Force on Emerging Infectious Diseases ti panagoperar ti pagpallutan ken pannakasubli ti traditional cockfighting kadagiti adda iti babaen ti Alert Level 2 ngem agdepende iti desisyon ti Local Government Units.
Segun iti Gobernador, awan ti agbalin a problema laketdi naiget a masurot dagiti pagalagadan nga inyetnag ti IATF.
Inbatadna a ti kosiderasyon iti pannakaisubli ti pallot ket ti bumabbaban a kaso ti covid-19 ditoy probinsya.
Kabayatanna, kuna ti gobernador nga adalenna a naimbag dagiti maiyimplimentar a pagannurutan tapno adda ti naurnos a suruten dagiti kakailian apaman a pormal a maisubli ti pallot ditoy probinsya.
Basar iti inparuk-at nga specific protocols ti IATF para kadagiti operators, adda ti 50 a porsiento a maximum iti venue capacity para kadagiti fully vaccinated individuals.
Amin nga on-site workers ken empleado kadagiti pagpallotan ket nasken a fully COVID-19 immunized.
Cashless met ti pusta ken agusar ti technology-based platforms ken adda ti panagmonitor ti Department of the Interior and Local Government wenno DILG.
Immunan a nagpalagip ni Presidential Acting Spokesperson Karlo Nograles a dagus a mapaserraan ti pagpallutan no bilang nagsalungasing dagiti operators kadagiti pagalagdan kangrunaan iti health protocols.
