LAOAG CITY – Binalakadan ni Gov. Imee Marcos dagiti agnanaed kadagiti narisgo a lugar nga agsagana iti mabalin a nasapa a pannakaibakwit da.
Segun ken ni Miss Rhona Isabelle Daoang, Officer In-charge ti Communications and Media Office daytoy ket gapu iti napinget a tarigagay ti gobernador a maiyadayo ti peggad dagiti kaprobinsiaan.
Imbatadna a nagapela ti gobernador kadagiti maseknan a saan nga agtukiad no makiddaw ti panagbakwit da.
Kunana a namnamaen ni Gob. Marcos nga agari ti napintas a panagtitimpuyog nangnangruna iti daytoy agpangpangta a panangduprak ti napigsa a bagyo ditoy amianan a Luzon.
Innayon ni Daoang a nagapela ti gobernador ti naan-anay a panagkararag tapno mailiklik ti probinsia iti ania man a peggad.
