LAOAG CITY – Inadmitir ni Gov. Matthew Marcos Manotoc a narigat a matun-oyan ti inaramid ti Cebu City a panangsangaili iti Palarong Pambansa 2024.
Kunana a ti Cebu ket maibilang kas develop ken highly urbanized city no sadinno a kabaelanda nga iwayat dagiti nagdududma nga aktibidad iti maymaysa laeng a lugar.
Innayonna pay a nakita a napintas ti media center, website a pangipublikaran ti resulta, QR code ken food park nga naestablisar kadagiti sports venues.
Nupay kasta, inpakaamo ni Manotoc a kabaelan ti probinsia nga ipaay dagitoy a banag iti Ilocano a wagas.
Inrakurakna nga maysa a tawenen iti napalabas sipud nangrugida nga agsagana babaen iti pannakitinnulong ti Provincial Sports Office.
Inbatadna a ti maysa kadagiti ad-adalenda nga agbalin a karit ket ti transportasion nga agturong kadagiti sports venues.
Maipalagip nga immunan nga inrakurak ni Atty. Nikki Pilar, mangidadaulo ti Metro Ilocos Norte Council a manarimaanen ti panagasagana ti opisinana para iti Palarong Pambansa.
Inbatadna nga adda ti maipaay a shuttle services kadagiti partisipantes tapno isu ti usarenda nga agbiahe manipod iti billeting area nga agturong kadagiti sports venue.
Iti agdama, kunana a nakasaritadan dagiti operators nga agbalin a shuttle service ngem iyur-uray da paylaeng ti dadduma pay nga operasion.
