LAOAG CITY – Inlawlawag ni Gov. Cecilia Araneta Marcos a napanunutanna nga inpaima ken ni Vice Gov. Matthew Marcos Manotoc ti pannaka-monitor iti benneg ti agrikultura ditoy probinsia gapu iti napintas a panagannayas ti Agri Ka Dito program a kangrunaan a programana kabayatan a daytoy ti gobernador ti probinsia.
Inbatadna nga indiaya ti bise gobernador iti immun-una a gundaway ti itutulongna kenkuana a mangipatungpal kadagiti programa ti probinsia ken gapu ta makitana nga epektibo iti benneg ti agrikultura isut gapuna a daytoy ti inpaimana kenkuana.
Kunana nga uray inpaimana daytoy iti bise gobernador ket nagtalinaed ti napintas a panagkammayetda para iti pannakaipaay ti naan-anay a tulong kadagiti mannalon, mangngalap ken livestock raisers ditoy probinsia.
Inpakaammo ti gobernador a maysa kadagiti mangipakita iti napintas a panagtinnulongda ket nakasagana ti pannakitaripnongna ken ni Agriculture Sec. Francisco Tiu Laurel Jr. iti masungad nga aldaw tapno pagsaritaanda no ania dagiti mabalin nga ipaay ti Department of Agriculture a tulong ditoy Ilocos Norte.
Mamati ni Gov. Marcos nga ad-adu ti maipaay a tulong kadagiti umili iti napintas a panagkammayetda iti bise gobernador nga agkiddaw ti tulong a mabalin a maipaay kadagiti umili.
