LAOAG CITY – Masmasdaaw ni Gob. Imee Marcos iti kadakkel ti diperensia ti pannakatang ti produkto dagiti mannalon nga irik ken ti presyo ti bagas a gatgatangen dagiti umili.
Imbatad ti gobernador a saanna a maawatan no pappapanan ti dakkel a gidiat ti presyo.
Inpaayna nga ehemplo ti 22 a pisos iti tunggal kilo a pannakagatang dagiti produkto dagiti mannalon a no mailakon kadagiti umili ket addaanen ti presyo nga 43 a pisos iti kada kilo.
Kunana a no ar-arigen ket adayo a dakdakkel ti mapaspastrek dagiti trader, transporter ken retailer wenno negosiante ngem kadagiti mannalon.
Mainaig iti daytoy, impetteng ti gobernador nga adda ti saan a nasayaat a mapaspasamak iti pannakaituding ti presyo ti nasao a produkto.
Natangken ti takderna a masapul a dagiti mannalon nga isu da ti agpatpataud iti nasao a produkto ti rumbeng a kadakkelan ti mapastrek.
