LAOAG CITY – Mangnamnama ni Governor Imee Marcos a malpas ti manual recount ti electoral protest ni dati a senador Bongbong Marcos kontra ken ni Vice President Leni Robredo kalpasan ti 90 nga aldaw.
Iti eksklusibo nga interview ti Bombo Radyo Laoag ken ni Gobernador Marcos, kalikagom na a malpas ti recount iti uneg ti 30 nga aldaw iti kada maysa a probinsya.
Karaman ditoy iti probinsya ti Camarines Sur, Iloilo ken Negros Oriental.
Mainaig ti daytoy, inbatad ni Marcos a matuukan ti kinabayag ti pannakabilang dagiti botos kalpasan a nagsanud dagiti uppat a lead revisors gapu ta maipagarop a napressure da iti umuna pay laeng nga aldaw ti recount.
Inadmitir pay ti gobernador a gapu ti kinabayag ti recount ket addan ti panagdanag na isut gapu na a naiget ti panagkarkararag da ken nagpaitugkel payen ti kandela iti la Birhen Milagrosa.
Immuna ti daytoy, kinumpirmaran ni Marcos nga umad-ado dagiti madukduktalan a discrepancy ti panagtultuloy ti recount.
