LAOAG CITY – Pinalukayan ni Gov. Cecilia Araneta Marcos ti pannakaipatungpal ti uppat nga aldaw a panagtrabaho dagiti empleado ti Provincial Government of Ilocos Norte.
Daytoy ket babaen iti panangipabus-uyna kadagiti empleado a mangpili no ania ti maymayat para kadakuada no manipud ti alas siete ti bigat agingga iti alas sais ti malem wenno manipud alas otso ti bigat agingga iti alas siete ti rabii.
Inlawlawagna a napanunutanna daytoy a banag tapno saan unay a marigatan dagiti naipakadawyan a saan nga agririing a masapa.
Inbatadna a ti napateg ket makapagtrabaho dagiti empleado ti sangapulo nga oras iti kada aldaw tapno makumpleto dagitoy ti 40 nga oras ti kada lawas.
Malaksid iti daytoy, inpakaammo ti gobernador a manarimaan a maad-adal ti pannakaiyurnos ti oras ken aldaw nga iseserrek dagiti job order nangnangruna kadagiti masapul ti serbisio dagitoy iti inaldaw.
Kabayatanna, inlawlawag ni Gov. Marcos a dagiti empleado ti hospital ken iti Provincial Resiliency Office ket saanda a mabalin ti sumrek laeng iti uneg ti uppat nga aldaw agsipud ta masapul ti serbisio dagitoy 24/7.
