LAOAG CITY – Dinayaw ni Governor Matthew Marcos-Manotoc ti Ilocos Norte Electric Cooperative iti sabali manen a naimballigian a proyekto nga insayangkatda kadwada ti AC Mobility partikular ti EV charging station iti ili ti Pagudpud.
Segun iti gobernador, ti orihinal a kiddawna ket para kadagiti Public Utility Vehicle, ngem sumaruno daytoy gapu ta masapol da paylaeng a kitaen no ania dagiti mabalin da a pagpilyan para iti nasao nga addang.
Kunana a napateg unay daytoy a panagkinnamayet ti nasao a kooperatiba ken ti kompanya ta makitana nu kasano ti kinaalisto ti transition dagiti electric vehicles ken high breed.
Innayon na a parte daytoy ti turismo ken public utility para kadagiti umili.
Mangnamnama ti gobernador a babaen iti nasao addang ket mangitunda ti napinpintas a direksyon para ti probinsia ken ad-ado pay a charging station.
Patienna a masapol nga agbalin a responsable dagiti lokal a gobierno a mangipaay kadagiti imprastraktura gapu ta umad-adon dagiti electric vehicles.
