LAOAG CITY – Simple laeng ti nagbalin a mensahe ni Governor Matthew Marcos-Manotoc iti selebrasyon ti maika-102 a panagkasangay ti lolo na a ni dati a Presidente Ferdinand Marcos ita nga aldaw.
Iti panagbitla ti gobernador iti sango a mismo ti monumento ti dati a presidente idiay ciudad ti Batac, inpalagip ni Manotoc ti kinatured ti dati a presidente kas maysa a soldado, abogado, ken mannakigubat.
Inpanakkel na nga uray nabotosan idi ti lolo na kas kangatoan a lider ditoy pagilyan ket saanna pulos a nalipatan ti pakaseknan ditoy Ilocos Norte.
Nagyaman ni Manotoc kadagiti amin nga opisyal ken empleado ti gobierno ditoy probinsya iti pannakikaysa da iti selebrasyon iti kasangay ti dati a presidente.
Kuna na a maragsakan gapu ta saan latta a malipatan a lagipen ken bigbigen ti inbati a legacy ti dati a presidente.
Mainaig ti daytoy, nagpanawagan ti gobernador kadagiti amin a taga Ilocos Norte a masapol nga agkaykaysa ken masapol nga aramiden amin a kabaelan tapno maprotehiran ti probinsya, aniaman a problema ken pannubok wenno didigra ti mapasaran.
Inpalagip ni Gobernador Manotoc ti pagsasao nga uray ania ti mapaspasamak ket sumingising to latta ti init.
