LAOAG CITY – Ibilang ni Gov. Matthew Marcos Manotoc a sayang laeng ti panagbalin a “Champion” ken “Legendary” iti Philippine Sports ni Mayor Micheal Marcos Keon ditoy siudad ti Laoag gapu ta ti Governor’s Cup nga ay-ayam para kadagiti agtutubo ket polpolitikaenna.
Segun kenkuana, adda isuna a mismo iti nakaiyuswatan ti Basketball Governor’s Cup ken ti napasamak a panagkakabil ti Team Laoag ken Team Dingras rason a kwinestionaranna ti biang ti mayor no nagatendar daytoy iti nadakamat nga aktibidad gapu ta saan na daytoy a nakita.
Innayonna nga inadmitir a mismo ti coach ti Team Laoag a nagkamali ti player-da sipud ta sinublianan ken dinanog ti padana a player iti Team Dingras.
Inlawlawag ni Manotoc, awan ti pakainaiganna iti nadakamat nga insidente sipud ta adda dagiti naaramid a rules and regulations iti ay-ayam ken nakita a mismo dagiti in-charge ti napasamak a panagkakabil.
Kinunana pay a paset iti ayayam ti saan a panagkikinaawatan ngem saan a masapol a kumaro.
Mainaig iti daytoy, inpakaammo ni Mr. Willie Jake Sibat ti Ilocos Norte Youth Development Council a naaddaan iti closed-door meeting kalpasan ti insidente.
Ditoy nga agpada a napalagipan dagiti dua team a nagkakabil maipanggep kadagiti house rules ken nasuspenso dagiti players a nairaman iti nadakamat nga insidente.
Kabayatanna, inlawlawag met ni Mr. Favio Bartolome, Sports Development Consultant nga adda ti nabuo a house rules rason a sinurot da laeng dagiti nakailanad iti daytoy.
