LAOAG CITY – Inbatad ni Governor Cecilia Araneta Marcos a kanayon ti pannakitaripnongna kadagiti local chief executive ditoy probinsia.
Kunana a babaen daytoy ket napinpintas ti koordinasyon da seknan ti pannakaiyimplementar dagiti programa ken proyekto.
Segun kenni Marcos, dagiti kangrunaan a pagsasaritaan da ket maipanggep iti turismo, investors, ken ti pannakikoordinar kadagiti national agencies.
Kabayatanna, inbatad na a bayat iti panagsursur na ket nakitana a saan unay a nadevelop ti pagsapulan dagiti mangngalap nupay nalawa ti kabaybayan a paset ti probinsia.
Gapu iti daytoy, kalikagom na a masursurwan dagiti mangngalap kadagiti sabali pay a wagas a pagsapulan malaksid iti panagkalap.
Karaman ditoy ti pagtaraken ken panangpreserbar kadagiti ikan a kas ti maar-aramid idiay Zamboanga nga isu ti naggapwan ti nasao a gobernador.
Iti met biang dagiti mannalon, ikonkonsiderar na ti panangipaay na ti subsidiya ken possible a pannakaisubli ti panaggatang ti irik manipod kadagiti mannalon.
Inlawlawagna a masapol a mapagsasaritaan a nasayaat daytoy tapno maiyalokaran ti pondo.
Innayon na a kasarita nanto digiti economic adviser na mainaig iti daytoy a banag.
