LAOAG CITY – Inbatad ni Governor Cecilia Araneta-Marcos a kasapulan nga adda dagiti nasapsapa a maipatungpal nga addang tapno maliklikan ti nakarkaro nga epekto ti nakaro a kinabara ti panawen wenno ti maaw-awagan ti “Super El Niño”.
Inbalakad ti gobernador a masapol nga amwen dagiti addang tapno maliklikan dagiti sakit a mabalin a mapasaran gapu iti nakaro a kinabara ti panawen.
Ginutigot na met dagiti senior citizens a liklikan da ti rumuar no awan laketdi ti napateg nga aramiden tapno saan da a maapektaran unay iti nabara a paniempo.
Kuna na pay a no rumuar iti pagtaengan ket siguradwen nga adda latta ti bitbit a danom tapno maliklikan ti pannaka-dehydrate.
Mainaig iti daytoy, inlungalong pay ti gobernador ti panagturong dagiti umili kadagiti mall tapno agpalamiis wenno panagbuya ti sine uray maminsan laeng ti kada lawas.
Kabayatanna, plano ni Marcos a kiddawen iti Sang Panlalawigan tapno mangputar da ti ordinansa para iti libre a panagbuya ti sine dagiti senior citizens ditoy probinsya.
