LAOAG CITY – Inlawlawag ni Governor Cecilia Araneta-Marcos ti isyu mainaig ti saan a panagtuloy dagiti atleta ti Ilocos Norte Diamond Softball idiay Florida, United States of America.
Segun iti gobernador, adda aminen ti visa dagiti atleta, ngem kadagupan dagiti pito a coaches ket dua laeng kadakuada ti naaprubaran ti visa na.
Inbatad ti gobernador a ti Perfect Game Philippines ket paset ti Perfect Games Asia Pacific & Japan no sadinno a daytoy ket rumrumuar a naaddaan ti isyu iti mother company na idiay Estados Unidos.
Kuna na a kanayun ti panagsurat ti Sports Development Council kadagiti maseknan nga ahensya tapno amwen ti sumaruno nga aramiden da para iti panagbiyahe idiay Amerika dagiti atleta ti probinsya, ngem awan ti nauray da a nalawag a sungbat.
Innayon ti gobernador a malaksid a dudua laeng dagiti coach ti team a naaprubaran ti visa na ket awan pay ti nalawag a pagdagusan da idiay Estados Unidos, kasta met ti transportation ken taraon da.
Gapu iti daytoy, inrakurak ni Governor Marcos a saanna a kayat a maisagmak dagiti atleta aglalo ket agpapada dagitoy a menor de edad no sadinno a possible a mapagatapan da pay a biktima ti human trafficking.
Inpaganetget na a maawatan na ti pannakadismaya dagiti maseknan a nagannak ngem awan ti sabali a prayoridad na no saan a ti mangipasigurado ti kinatalged dagiti atleta.
Inkalintegan ti gobernador nga ado pay dagiti mabalin a pakipartisiparan dagiti atleta kalpasan a saanda a natuloy a napan nakilaban idiay Florida, USA.
