LAOAG CITY – Manamnama a mapasayaat ti panagkalap ditoy probinsya babaen ti tulong ti Taiwan.
Segun kenni Governor Cecilia Araneta-Marcos, maysa daytoy kadagiti napagsasaritaan iti panagatendar da ti naisayangkat a Taiwan Summit iti kallabes.
Kuna na a kalikagom ti Taiwan ti makikoordinar kadagiti mangngalap ditoy probinsya.
Inbatad pay ti gobernador a kayat ti Taiwan ti mangipaay ti fishing boat nga usaren kadagiti mangngalap ditoy probinsya.
Innayon na a saan laeng a basta fishing boat ti kayat nga ipaay ti Taiwan no di ket dagiti dadakkel a bangka nga addaan ti satellite a pakakitaan dagiti maiyannatop a pagdalanan iti baybay.
Mainaig iti daytoy, patien ti gobernador a no dakdakkel dagiti bangka nga usaren dagiti mangngalap ditoy probinsya ket nataltalged ti papanda panagkalap iti baybay.
Mangnamnama ni Governor Marcos nga adda ti maaramid a katulagan iti kabiitan a panawen para iti pannakibinnulig ti Taiwan dagiti mangngalap ditoy probinsya.
