LAOAG CITY – Nagapela ni Gob. Imee Marcos ken ni Pres. Rodrigo Duterte a masuspenso ti value added tax wenno VAT iti “basic food items”, langis ken elektrisidad.
Inlungalong ti gobernador a maisardeng daytoy iti uray makatawen laeng a patienna nga awan met unay ti agbalin nga epektona iti gobierno.
Inlawlawagna a mabalin met pay laeng a maisupusop iti mapukaw a mapastrek ti gobierno dagiti pundo a saan a nabusbos dagiti nadumaduma nga ahensia.
Mamati ni Gob. Marcos nga alisto a maipababa ti Duterte administration ti inflation no masuspenso pay laeng ti VAT.
Kunana a masapul a temporario a maikkat dagiti saan unay a kasapulan a pagalagadan, papeles wenno pirma iti “retail industry” ken naur-urnos a teamwork dagiti economic managers ti gobierno.
Maipalagip nga idi panawen ti amana a daydi Pres. Ferdinand Marcos ket saanna a tinungpal ti pagayatan ti International Monetary Fund ken World Bank a mangipataw ti VAT ket inkalinteganna a daytoy ti mangparigat kadagiti umili.
