LAOAG CITY – Sinuspenso ni Governor Matthew Marcos Manotoc ti trabaho kadagiti opisina ti gobierno ken klase kadagiti pampubliko a pagadalan iti amin a level ditoy probinsya ita nga aldaw, Setyembre 26 gapu iti bagyo Karding.
Daytoy ket kalpasan nga inaprubaran ni Presidente Ferdinand “Bongbong” Marcos Jr. ti rekomendasyon ti National Disaster Risk Reduction and Management Council (NDRRMC) a masuspenso intono bigat, Lunes, setyembre 26 ti serrek iti trabaho kadagiti opisina ti gobierno ken klase iti amin a level kadagiti lugar nga apektado ti Bagyo Karding a pakairamanan ditoy Ilocos Norte.
Inrakurak ni Gobernador Manotoc a ti trabaho kadagiti pribado a kompanya ken klase kadagiti pribado a pagadalan ket makaammon dagiti mangidaulo nga agdesisyon kas naipalaon iti pagalagadan ti Department of Education (DepEd).
Binalakadan ti gobernador ti publiko nga agannad ken agridam iti iduduprak ti bagyo Karding ditoy probinsya.
