LAOAG CITY – Pursigido ni Gob. Matthew Marcos Manotoc iti tarigagayna a makutkutan dagiti dadakkel a karayan ditoy probinsia.
Mainaig iti daytoy, naisayangkat iti kallabes iti groundbreaking iti Tina Cora River ti ili a Solsona.
Mamati ti gobernador a kangrunaan a tulbek iti panagballigi daytoy a proyekto ti napintas a panagkammayet ti Local Government Unit wenno LGU ken ti pribado a sector.
Nupay kasta, inpagunamgunamna a maipangpangruna ti kinatalged dagiti kakailian ken ti livelihood dagitoy.
Impetteng ni Gob. Marcos Manotoc a pagrebbengan ti Local Government Unit ken dagiti “quarry operators” a maipasigurado a mabenipisiaran ti komunidad
Inbunannagna a masapul a masigurado nga agtultuloy ti panagdur-as ti ekonomia kadagiti nadakamat a lugar a natalged dagiti tattao ken direkta a marikna dagiti kakailian ti pagsayaatan nga ipaay ti nasao a proyekto.
Nagpanawagan ti gobernador iti pannakasurot a naimbag dagiti pagalagadan iti tulong ni Atty. Yvette Leynes a Provincial Quarry Officer.
Kagiddan daytoy, nagyaman iti partisipasyon ti tunggal maysa ken ginutigotna dagitoy a mangisigurado a saan laeng nga agpatingga iti pannakairubuat ti proyekto ngem agtultuloy ti pannakaipatungpal ti schedule.
Innayonna a nasken a masurot ti plano ken maipasigurado a Tunggal maysa ket mabenipisiaran iti nasao a proyekto.
