LAOAG CITY – Umabot iti sanga gasut pitopulo ket pito (170) ti kaso ti “teenage pregnancy” ditoy Ilocos Norte manipud idi bulan ti Enero agingga idi Mayo tres ita a tawen.
Segun ken ni Mrs. Janet London, mangidadaulo ti Gender and Development Office, walopulo ket maysa (81) kadagitoy ti manipud iti umuna a distrito ken siyam a pulo ket innem (96) ti manipud iti maikadua a distrito ti probinsia.
Mainaig iti daytoy, impalgakna a makumikum iti agdama dagiti maseknan nga ahensia ti gobierno ti gobierno probinsial kangrunaanna iti Gender and Development Office no kasano a makatulong ti probinsia.
Imbatadna a maalarma ni Gob. Matthew Marcos Manotoc iti kaadu dagiti agtutubo nga agtawen ti sangapulo ket tallo agingga iti sangapulo ket siyam a nagsikog.
Inlawlawagna a nakuna ti gobernador a masapul a makitinnulong dagiti mayor iti daytoy a problema.
Mainaig iti daytoy, inbunannag ni London nga iti agdama ket mannarimaan ti pannakikoordinar ti opisinada kadagiti nagduduma a Local Government Units para iti pannakaisayangkat ti “responsible adolescence sexuality” gapu ta kaaddoan kadagiti nasao a kaso ket dagiti ubbing nga agad-adal nga umadanin ti panagbalin dagitoy nga inna.
Imbatadna nga addan ti kunpirmasyon ti gobierno munisipal ti ili a Sarrat para iti pannakaisayangkat ti “responsible adolescence sexuality symposium” idiay Sta. Rosa National High School ken iti Sarrat National High School.
Impalgakna a karaman kadagiti inawisda nga agbalin nga speaker ti mangidadaulo iti obygyne department a ni Dr. Czarina Alcaraz ken ni Mrs. Divine Sevilla ti Speak Up I’m Here.
Mamati ni London a ti kangrunaan a rason iti daytoy ket ti panagkalikagum dagiti agtutubo a mangipadas kadagiti mabuybuya da nangnangruna ket mabalin met aminen a mabuya iti cellphone nupay saan nga ammo dagiti maseknan no ania ti ibunga ti aramidenda.
Mainaig iti daytoy, nagpanawagan kadagiti nagannak ti panangbantay da a naimbag kadagiti annakda.
