LAOAG CITY – Pinirmaanen ni Governor Matthew Marcos-Manotoc ti inpasa a resolusyon ti junta probinsyal para iti pannakaideklarar ti Ilocos Norte iti babaen ti state of calamity gapu iti iduduprak ti Super Typhoon Carina.
Daytoy ti kinumpirmaran ni Mr. Gervy James Gumarit, ti mangidadaulo iti Communication and Media Office (CMO) iti kapitolyo probinsyal.
Immunan nga inaprobaran ti Sangguniang Panlalawigan ti maysa a resolusion para iti pannakaideklarar ti State of Calamity iti Ilocos Norte gapu iti kaado dagiti nadadael iti biang ti imprastraktura ken agrikultura, ken naruay dagiti residente a naapektaran ti bagyo.
Segun ken ni Sangguniang Panlalawigan Member Franklin Respicio, naipasa ti nasao a resolusion tapno naan-anay a maiparuk-at ti calamity fund ken matulungan dagiti nakaro a naapektaran ti nasao a bagyo.
Inbatadna nga umabot iti nasurok a maysa a bilyon a pisos ti balor dagiti nadadael iti benneg ti agrikultura, imprastraktura, ken dadduma pay.
Mainaig iti daytoy, inpakaammo ni Engr. Randy Nicolas, ti pannakabagi ti Provincial Disaster Risk Reduction and Management Office nga adda ti sumurok-kumurang 700 a milyon a pisos ti balor ti nadadael iti benneg ti imprastraktura, sumurok-kumurang 15 a milyon a pisos met iti agrikultura idinto a nakairekord ti nasurok 300 a milyon a pisos ti Department of Public Works and Highways 1st ken 2nd District Engineering Office, Provincial Engineering Office ken National Irrigation Administration.
Inlawlawagna nga adda ti 3,288 a pamilia a bukbuklen ti 10,852 nga indibidual ti naapektaran iti isasaplit ti Super Typhoon Carina.
Innayonna nga adda ti 23 a pagtaengan ti partially damaged ken dua ti naimaldit a napasamak a landslide.
