LAOAG CITY – Inlawlawag ni Ms. Flora Mae Rondoen, General Parents Teachers Association Secretary ti Tonoton Elementary School Piddig District mainaig iti Parent’s Clearance.
Segun kenkuana, adda ti naputar a Resolution No. 2 Series 2019 a mangipalubos iti pannakaipatungpal ti Parent’s Clearance dagiti nagannak dagiti estudiante iti nasao a pagadalan.
Inbatadna a sakbay a naan-anay a naipasa daytoy a resolusion ket adda ti naisayangkat a taripnong dagiti maseknan a nagannak ket ditoy a napagnunumoanda nga umannugotda iti pannakaipatungpal iti Parent’s Clearance.
Kunana nga idi Nobiembre 2023 ket naadaptar ti Parent’s Clearance ken napaayaban dagiti nagannak tapno mapagsasaritaan daytoy a naimbag ken awan met ti nagreklamo.
Mainaig iti daytoy, inpakaammo ni Rondoen a ti membership fee ket masapul nga agbayad iti kada tawen dagiti baro a nagannak iti pagadalan ti 140 a pisos idinto a 70 a pisos para kadagiti datin a nagannak.
Inpettengna nga adda ti naiwayat a taripnong dagiti nagannak nga indauloan ti Parents Teachers Association President a mangipatawda ti multa kalpasan a naobserbaranda nga adda dagiti sumagmamano a nagannak ti saan nga agat-atendar para iti Oplan Dalus iti tunggal umuna nga aldaw ti Lunes iti kada bulan.
Nupay kasta, kunana a no bilang saan a makaatendar ti maysa a nagannak iti Oplan Dalus ket mabalin dagitoy nga agdalus iti aniaman nga aldaw a masangoda.
Inlawlawagna a 100 a pisos ti napagnunumoan dagiti nagannak a maipataw a multa kadagiti saan a makapan iti Oplan Dalus.
Kunana a ti voluntary contributions iti Parent’s Clearance ket saan nga ingkapilitan ngem magutgutigot dagitoy a makipaset.
Innayonna a saanda a mabalin a pangigawidan dagitoy kadagiti records dagiti estudianteda no nakabayadda man wenno saan.
