LAOAG CITY – Inburay ni Mr. Phillip Richard Dagwasi, Grade 11 student ti Nueva Era National High School nga agtawen ti 17 a residente ti Brgy. 11, Acnam iti ili ti Nueva Era ti talentona a matulad ti timek dagiti drama talent ti radyo pakairamanan dagiti nalalatak a bida iti drama ti Bombo Radyo kas ken ni Chairman Gusting, Super Pepita ken dadduma pay.
Segun kenkuana, manarimaan ti panagrekordda iti pagtaenganda para iti presentasionda iti masungad a Inter-faith ti Praise and Worship iti pannakaselebar ti Tadek Festival iti nasao nga ili.
Inbatadna a nagutigot isuna a mangtulad kadagiti timek dagiti bida iti nagduduma a drama iti radyo iti mismo sangoanan dagiti padana nga agtutubo iti simbaan.
Kunana a napintas daytoy a talento a naipaay kenkuana manipod iti Namarsua gapu ta mabalinna nga usaren a pangliwliwa ken makipaay ti inspirasion kadagiti agtutubo ita nga henerasion.
Inlawlawagna a babaen iti talentona ket isu ti nangted wagas tapno maam-ammona dagiti idolona iti drama ti radyo nga ad-adda pay a nangiduron kenkuana nga itultuloyna daytoy ken ilalaingna pay agingga a makasursuro ti ad-adu pay nga istilo iti panagtulad ti timek.
Innayonna nga usarenna daytoy a talentona tapno ad-adda pay a makainspirar kadagiti dadduma nangruna para kadagiti ubbing ken agtutubo pakairamanan ti pannakailiklik dagitoy ti dakes a dana.
