LAOAG CITY – Inbatad ni Mr. Rommel Baltazar, coach ti gold medalist sa Archery 30-meter qualifying a ni Jimmuel James Espiritu nga idi rinugyan da ti nagsanay para iti Palarong Pambansa ket puntirya dan ti makagun-od ti balitok a medalya.
Gapu iti daytoy, maragsakan ni Baltazar gapu ta saan a pinaay ni Espiritu kalpasan a nakagun-od ti balitok a medalya para iti archery.
Ni Espiritu ket grade 12 student iti San Nicolas National High School iti ili ti San Nicolas ken daytoyen ti maikadwa a gundaway a makilaban iti Palarong Pambansa.
Segun kenni Baltazar, ti nakalaban ni Espiritu ket dagiti siguden a makilablaban iti Palarong Pambansa ken agap-akop ti balitok a medalya kas iti National Capital Region (NCR), Central Luzon, Soccsargen ken Central Visayas.
Mainaig iti daytoy, inpakaammo ni Espiritu a ti kangrunaan a naggutigot kenkuana para iti ay-ayam nga archery ket ti ama na.
Mangnamnama ni Espiritu a kadagiti sumarsaruno pay a labanna ket manayunan na ti iggem na a balitok a medalya.
Kabayatanna, inpeksa ni School Principal Florante Riego iti San Nicolas National High School ti panangipannakkel ken kinaragsak da gapu iti naipaay a pammadayaw ti estudyante da, saan laeng a ti mismo a pagadalan da no di ket iti intero a rehiyon Uno.
Innayon na a ni laeng Espiritu ti kakaisuna a na-qualify nga estudyante da a nakilaban iti Palarong Pambansa a manarimaan a maiyus-uswat idiay Cebu City ken saanna a pinaay dagitoy gapu ta nakagun-oden ti balitok a medalya para iti ay-ayam nga Archery.
