LAOAG CITY – Pimmusay ti maysa a Grade 11 student a lalaki kalpasan a natumba ti nagkulimbitinanna a nakaikapetan ti soccer goal post iti Northwestern University ditoy siudad ti Laoag.
Basar iti inisyal nga impormasion a nakalap ti News Team ti Bombo Radyo Laoag, manarimaan pay laeng ti isaysayangkat nga imbestigasion dagiti otoridad ti Philippine National Police pakairamanan ti pannakabagi ti Department of Education ditoy siudad ti Laoag.
Segun kadagiti nakasarsarita ti News Team, napasamak ti aksidente kabayatan ti panagsanayda iti ground iti nasao nga unibersidad para iti mapaspasangasangan a Region 1 Athletic Association Meet.
Gapu iti daytoy, naitaray iti Laoag City General Hospital ti maseknan nga estudiante idinto a nakaliklik iti desgrasia ti maysa pay nga agad-adal.
Mainaig iti daytoy, manarimaan pay laeng nga am-ammoen dagiti pannakabagi ti linteg no ania a paset ti bagi ti biktima ti napandagan a nangitunda ti panagsagabana ti nakana a sugat.
Kabayatanna, ikarkarigatan ti News Team ti Bombo Radyo Laoag nga alaen ti takder ti maseknan nga ahensia ti gobierno ken ti pagadalan a nakapasamakan ti aksidente.
