LAOAG CITY – Natay ti maysa a Grade 2 student a lalaki nga agtawen iti pito kalpasan a nalmes iti waig iti Sitio Bullilising iti Brgy. 3, Cangrunaan iti siudad ti Batac.
Segun ken ni Ms. Ronalyn Binala, ikit ti biktima a binilinna dagiti kaanakanna a maturog gapu ta mapanda iti kataltalonan.
Nupay kasta, kunana nga apaman a nakatalawdan iti pagtaenganda ket saanna a ninamnama a nagturong dagiti kaanakanna iti maysa a waig ket ditoyda a nagdidigus.
Inlawlawagna a kalpasan laeng ti sumagmamano a minuto, kabayatan nga agdidigus dagiti ubbing pakairamanan dagiti kaanakanna nga agsingin a babai ken lalaki ket napanda iti naadalem a paset ti waig a pagat-tao ti kaunegna a nangitunda ti pannakalmesda.
Gapu iti daytoy, inpalgakna nga inkarigatan dagiti kaanakanna nga agsingin a mapan iti igid ti waig ngem nakaibbat ti lalaki iti kasinginna a babai isu a nabati daytoy iti tengnga ti waig.
Kunana a nagawid ti kaanakanna a babai tapno agkiddaw ti tulong ken inbagana a malmalmes ti kasinginna a lalaki ngem saanda dagus daytoy a pinati agingga a saanda metten a makita ti kasinginna ket ditoy a nagal-alistoda a napan iti waig no sadinno nabirukanda ti bagi ti ubing iti naadalem a paset iti waig.
Innayonna a pinadasda pay nga insalakan ti ubing babaen iti panangiwayatda ti cardiopulmonary resuscitation agingga a naitaray iti ospital ngem saanen a naisalbar pay ti biagna.
Kabayatanna, bayat a maisursurat daytoy a damag ket saan pay a naipakaammo ti nakaam-ames a pasamak iti ama dagiti agsingin.
