LAOAG CITY – Maysa a Grade 3 pupil a ni alyas Jonard ti Maria Cristina Falls Elementary School iti Iligan City ti adda iti kritikal a kondisyon iti ospital kalpasan a nagtitinnulungan a kinabil ti 5 nga high school students.
Basar iti report, bayat a mangmangan iti pangaldaw ti ubing ket bigla lattan a nagrarangasan a kinabkabil dagiti lima nga estudyante iti sekondarya.
Iti palawag dagiti nakaimatang iti insidente, karaman a dinanug dagiti lima nga estudyante ket ti ulo ti biktima.
Gapu iti nakaro a sinagaba a sugat ti biktima ket dagus a naitaray iti Northern Mindanao Medical Center sa Cagayan de Oro City nga iti agdama ket adda iti Intensive Care Unit (ICU).
Iyik-ikkis met ti pamilya ni Jonard ti hustisya ken agpanpanawagan da pay ti tulong-pinansyal para iti inaldaw a gastusen da kabayatan nga agpapaimbag iti ospital ti biktima.
Immunan a kinondenar ni Iligan City Mayor Frederick Siao ti insidente ken inpasiguraado na a saanna a palabsen ti napasamak.
Innayon na a nakikoordinaren kadagiti otoridad ken iti Department of Education para iti imbestigasyon ken pannakabigbig kadagiti lima nga estudyante.
Nangipaay pay ni Mayor Siao ti pinansyal a tulong iti pamilya ti biktima para iti gastusen da iti ospital.
Nagpanawagan pay kadagiti pagadalan ken nagannak a paigetan ti panagbantay kadagiti estudyante.
