BOMBO LAOAG – Inburay ti maysa a Grade 3 pupil iti Bangsirit Elementary School iti Barangay Bani, Bacarra, Ilocos Norte ti nagbalin a kapadasan na kalpasan a maipagarop a ginandat a sibrungen dagiti nakalugan ti maysa a pickup nga agmaris ti nangisit ken awan ti plate number na.
Segun ti ubing a naawagan laeng iti ‘Totoy’, bayat nga agawid iti balay da ket nagsardeng ti pickup iti asideg na ket nagdamag da no paggatangan iti ice candy.
Kalpasan nga inbaga na ti ayan ti aglaklako iti ice candy ket inawis da daytoy a mapan da gumatang ngem nagkedked ti ubing.
Gapu ta nagkedked ti ubing ket inbaga manen ti driver ti truck nga aglugan iti lugan da gapu ta adda sakit ti ama na.
Nupay kasta, kuna ti ubing a nakasarita na ti ama na sakbay a napan iti eskwela ken nasalun-at daytoy isut gapu na nga imbes a napan naglugan ket nagtartaray a napan nagpaisalakan iti balay nga asideg ti nasao a lugar.
Kabayatanna, inbatad ti ama ti ubing a ni Mr. Mark John Cadiz a mapan na suksukunen ti anak na tunggal panaggaawiden ngem idi laeng a saanna a napan naala gapu ta immay ditoy ciudad ti Laoag.
