LAOAG CITY – Malidayan ti maysa nga ina gapo ta mabutengen ti anak na a sumrek iti pagadalan partikular iti Bacarra Central Elementary School.
Segun kenni Mrs. Rosalie Alonggogan, residente iti ili ti Bacarra, namunaganay daytoy kalpasan a nakita ti anak na ti janitress a ni Janet Opra a nagibelleng ti basura iti mismo a pagdaldalusan na wenno iti likod ti clinic.
Inlawlawag na a nagsasarita da iti opisina ti principal a ni Mrs. Leonora Aguada ken nagbalin a nabara ti panagsasarita da gapo ta maipagarop a pinagsawsaw-an ti principal ti anak na no sadinno ket intudtudo na ken binagaan na nga ulbod daytoy.
Inbatad na a mabuteng ti anak na a sumrek gapo ta rumrumuar a no makita ti ubing ti principal ket dumakkel ti mata na ken napakigtotan iti mapaipagarop a panangitudtudo ti principal.
Inpetteng na nga idi sumungbat isuna ket kellaat lattan a nagibarsak ti principal ti flower vase ken nangato ti boses ken kageddan ti panagruwar na ket dinakamat na a mapull-out dagiti agina iti pagadalan.
Naamoan nga innem nga aldawen a saan a simrek iti pagadalan ti ubing ken itay pinilit na ket naglibas rason a binirbirok na manen daytoy.
Mainaig iti daytoy, patien ni Alonggogan a kinanunungan ti principal ti maipagarop a madi nga inaramid ti janitress.
Innayon na nga iti agdama ket saan pay a napan iti pagadalan ti ina ken ur-urayen na ti panangpaayab da kenkuana para kuma iti panagsasarita da.
Kinumprimaran met ti menor de edad a mabuteng a sumrek gapo iti inaramid ti principal kenkuana ken mapan laeng agbasa no maikkat ti principal a ni Mrs. Aguada.
Kabayatanna, bayat ti panakisarita ti Bombo Radyo Laoag kenni Opra ken nadakamat na a naibaga ti principal nga ulbod ti ubing.
Kageddan iti daytoy ket naglikudan ni Opra a nagibelleng isuna iti pagdaldalusan ni Alonggogan ken nalpas metten ti panagsasarita da iti opisina ti principal.
Ikarkarigatan ti bombo nga alaan ti komento ti pagadalan partikular iti principal.
