LAOAG CITY – Agpanpanawagan ni Ms. Jovelyn Gaoiran a residente ti Brgy. 52, Lataag ditoy siudad ti Laoag iti publiko kalpasan a nagtalaw ti kabsatna a ni Maribelle Gaoiran, agtawen iti 14 ken Grade 8 student.
Segun kenkuana, idi naminsan a rabii ket kellaat lattan a nagtalaw iti pagtaenganda ti kabsatna iti saan a masinunuo a rason.
Inbatadna a maysa a bigat ket birbiruken ti inana ti maseknan a kabsatna ket ditoyda a naripar a mapukpukawen daytoy.
Kunana nga awan met ti malagipda a mabalin a nangitunda ti panagtalaw ti kabsatna gapu ta saanda met nga inung-ungtan daytoy.
Nupay kasta, inpalgakna a patienda a ti posible a rason ti panagtalaw ti kabsatna ket saanda a napatgan ti kiddawna nga umakar ti pagadalan a pagbasaanna.
Innayonna a daytoy met ti umuna a gundaway nga inaramid ti kabsatna a tumalaw iti pagtaenganda a saan a nagpakada kadakuada.
Immuna iti daytoy, nagkamang ni Ms. Jovelyn Gaoiran ditoy Bombo Radyo Laoag tapno agpanawagan nga agawiden ti kabsatna iti kabiitan a panawen nangruna ket madanagan unayen dagiti nagannakda.
