LAOAG CITY – Pursigido ni Mrs. Hazel Joy Sagadraca iti ili ti Bacarra a mangipila ti reklamo kontra kadagiti dua a lallaki a nangkabil iti anak na nga agtawen ti 14 ken Grade 9 student iti Bacarra National Comprehensive High School.

Ummuna iti daytoy, nasdaaw ni Sagadraca idi adda ti nangipakammo kenkuana iti napasamak iti anak na rason a dagus na a tinawagan ti menor de edad ken napan da inpablotter iti PNP ken nagpa-medical.

Segun kenni Sagadraca, naamoan na manipud iti anak nga idi lunchbreak iti aldaw ti Huwebes ket rimuar da iti pagadalan kadua na pay ti maysa nga estudyante.

Kunana a damagen laeng kuma ti kadua ti anak na iti maysa pay nga estudyante no anya ti basol na ngem ditoy metten a napasamak ti panagdangran ken idi nag-react ti anak na ket isu metten ti naisublat a nadandanog partikular iti rupa na.

Inpetteng na a nangeg na pay iti nagviral a video a naibaga ti anak na ti “Saan manong” ken sangsanggaan na ti rupa na ngem awan man laeng ti naganawa no diket adda laeng ti nangibaga ti “usto nan pare”.

Dinakamat na a nadeterminar da dagiti dua a nangkabil iti anak na a binigbig na ti “Carlo James Paredes” , maysa met laeng nga estudyante ken ti “Irine Jay Agustin”.

Mainaig iti daytoy, kunana nga iti papan da iti pulisya ket dtoy a naamoan da nga adda pay ti kinabail dagiti dua iti bigat met laeng ti Huwebes.

Patien na nga uray napasamak daytoy iti ruwar ti pagadalan ket napinpintas latta kuma a maipakammo iti Principal tapno ammo da ti napaspasamak.

Kalikagom ita ti ina a maikkan ti pagmenna-mennaan dagiti maseknan nangruna ket addan dagiti sayangguseng nga adda pay ti dinangdangran dagitoy iti sabali a lugar.

Kabayatanna, inbatad ti biktima Grade 9 student no kasano ti pannakadangran na babaen iti maysa a grupo no sadinno ket nadanog-danog ti rupa na.

Segun iti daytoy, nasabat da ti grupo dagiti suspek ken idi napan dagiti maseknan iti ayan da a dua ket ado metten dagiti kakadua da ken dagus da a tinulpak ti kadua na.

Inlawlawag nga idi naibaga na laeng ti “ney” kalpasan a nadanog ti kadua na ket isuna metten ti insublat da.