LAOAG CITY – Inbatad ni Geoff Jude T. San Agustin, Grade 9 student iti Philippine Science High School Ilocos Region Campus ken residente iti Barangay 15, San Guillermo ditoy ciudad ti Laoag a dakkel a pakaidayawan na iti pannakagun-od na ti gold award iti nakisalipan na a 2022 Newtonian International Physics Olympiad Challenge (NIPOC) no sadinno a naiyuswat ti semifinals idi pebrero 26 idinto a ti finals ket idi Marso 5 ita a tawen.
Kuna na a saan laeng nga iti Ilocos Norte ti inrepresentaran na no di ket iti intero a pagilyan.
Ti NIPOC ket inorganisar ti Organizing Center for STEM Olympiad (OCSO) ken nakisalipan ti 26 a pagilyan.
Karaman kadagiti nagbabalubal a pagilyan ket ti Indonesia, Brazil, Mexico, Philippines, Kyrgyzstan, Bangladesh, Vietnam, Cambodia, Malaysia, Nepal, Romania, Macedonia, Honduras, Peru, Bolivia, India, Georgia, Equador, Kazakhstan, USA, Colombia, Greece, Bulgaria, Syria, Thailand, ken Azerbaijan.
Inadmitir ni Agustin a narigat ti eksaminasyon gapu ta adda pay dagiti topiko a saanna a pulos a naadal iti unos ti panageskwela na.
Nagyaman ni Agustin gapu ta kinabaelan na a sinungbatan dagiti saludsud iti eksaminasyon uray kasla napespes ti utek na.
Inpakaammo na a ti NIPOC ket maysa a pa-contest iti Physics wenno branch ti science nga agtipon ti Sciences ken Math no sadinno nga agcompute da kadagiti nagduduma a banag kas koma no kasanu nga agkuti ken ania dagiti kasapulan a pwersa tapno adda ti maubra iti maysa a banag.
Malaksid ken ni Agustin ket adda pay ti tallo a kadwa na a nakisalip iti NIPOC manipud ditoy probinsya no sadinno a nakagund-od ti maysa ti silver award idinto nga agpada a bronze ti nagun-od dagiti dua.
Innayon na a ti nakita na a lamang ti Pilipinas iti biang ti edukasyon iti sabali a pagilyan ket matututukan a naimbag dagiti estudyante iti amin a leksyon.
Kuna pay ni Agustin a ti maysa pay a nagturedan na a nakisalip iti NIPOC ket gapu iti suporta nga inpaay ti pamilya na ken dagiti mangisursuro kenkuana kangrunaan na iti mestra na ti Physic I a ni Miss Sharon Palomares. Inpalgak na a saan a prinessure dagiti mangisursuro kangrunaan na ni Palomares ngem ketdi inbalakad da nga ipaay da laeng ti kabaelan da kagiddan ti panangibaga da nga agtalek da kadakuada isut gapuna nga agtalek da met iti bagbagida nga isumet ti inmula da iti panunot ken inaramid da.
