LAOAG CITY – Nalmes ti maysa a graduating student iti Baruyen Dam iti ili ti Bangui.
Segun ken ni P/Capt. Irineo Sibucao Jr., Hepe ti Bangui Municipal Police Station, ti biktima ket agtawen ti 16, Grade 10 student ken residente ti Barangay Utol iti nasao nga ili.
Inbatadna a basar iti inwayatda nga imbestigasion, nagturong ti biktima kaduana ti tallo pay a kaklasena iti nadakamat a dam tapno agpi-picnic dagitoy.
Inlawlawagna a kabayatan ti panagdidigus dagiti uppat a Grade 10 students iti dam ket naipan iti naadalem a paset ti biktima agingga a naipatengnga daytoy a nangitunda ti pannakalmesna.
Gapu iti daytoy, insigida a nagkiddaw ti tulong dagiti kaklase ti biktima gapu ta maamakda a nangisalakan ti biktima gapu iti posible nga isuda ti sumaruno a malmes.
Kunana a dimmanon iti agarup 20 a minuto sakbay a naiyahon ti bagi ti biktima ken insigida a nangisayangkat dagiti otoridad ti cardiopulmonary resuscitation wenno CPR.
Naitaray iti Bangui District Hospital ti biktima ngem naideklarar a dead on arrival babaen ti attending physician.
Kabayatanna, nagballaag ni P/Capt. Sibucao Jr. kadagiti agturturong iti nasao a dam nga agan-annad ken saan nga insigida a tumapog iti dam no awan ti kaduada nga ammona ti aglangoy tapno maliklikan ti nasao nga insidente.
