LAOAG CITY – Imbasura ti Sandiganbayan ti graft case kontra ken ni dati nga Iloilo City Mayor Jed Mabilog mainaig iti maipagarup panangmitirna iti panagited ti kontrata ti gobierno iti maysa a towing services firm.
Iti resolusion a naiparuk-at idi Agosto 12, pinalubosan ti Third Division ti Sandiganbayan ti mosion ni Mabilog nga ibasura ti kaso.
Segun iti korte, naaddaan ti saan a nainkalintegan a pannakaitantan iti preliminary investigation, ken saan a nailawlawag ti Office of the Ombudsman no apay a naitantan ti panangipilada ti kaso.
Maipalagip a ni Mabilog ken dagiti dadduma pay ket naakusaran ti panagserrek iti maysa a memorandum of agreement pakairamanan ti 3L Towing Services no nsadinno ket napalubosan ti nasao a kumpanya nga ag-clamp ken mangi-tow kadagiti iligal a nakaparada a luglugan iti Iloilo City a saan a dimmalan iti competitive process.
Basar iti rekord ti korte, naipila ti reklamo kontra ken ni Mabilog idi Abril 2015. Naawat ti Ombudsman ti counter-affidavit-na idi Agosto iti kapadana metlaeng a tawen ken idinto a naiparuk-at ti consolidated resolution idi Marso 2017.
Idi Hunio 2019, pinal nga pinatibker ti Ombudsman ti resolusion, ngem idi Marso 2023 pay laeng a naipila ti kaso iti Sandiganbayan.
Gapu iti daytoy, immabot ti pito a tawen, sangapulo a bulan ken pito nga aldaw ti napalabas manipud idi naipila ti reklamo agingga ti pannakaipila ti impormasion iti korte.
Kabayatanna, inlawlawag ti Ombudsman ti pannakaitantan ti nasao a reklamo babaen iti distansia ti Cebu office ken central office, karaman pay ti nagbalin nga epekto ti COVID-19 pandemic.
Karaman ti panangibasura ti kaso, imbabawi pay ti korte ti hold and departure order kontra ken ni Mabilog ket binilinda pay ti pannakaiparuk-at ti bail bond-na.
Ti nasao a desision ket insurat ni Third Division Chairperson Karl Miranda. Bayat a saan a sinang-ayunan da associate Justices Ronald Moreno ken J. Ermin Miguel.
